Saturday, October 18, 2014

படிமச் சிங்கமும் பன்னாட்டு நிறுவன மேலாளரும்

இந்த சிங்கம் சில நாட்களாகவே என்னைப் படுத்திக்கொண்டிருக்கிறது.  அது தரும் தொல்லை தாங்க முடியாமலே இந்த வலைப்பதிவை எழுதினேன்.  சில மாதங்கள் திருப்தியாக உறங்கிய சிங்கம் நேற்று விழித்தெழுந்தது.  சிறு குழந்தை போலவும்லாரி ரேடியேட்டர் போலவும் 'தினமும் எண்ணை கவனி' என்று உறுமியது.  தொலைக்காட்சியிலோ, பத்திரிக்கை விளம்பரத்திலோ இருந்த ஒரு ஆண் சிங்கம் என் மகன் கண்ணில் பட்டுவிட்டது.  'என்ன ஒரு சோம்பேறி மிருகம் இது.  பெண் சிங்கங்கள் வேட்டையாடியதை சொந்தம் கொண்டாடும் ஈனப்பிறவி அது'.  

என் மனதில் உறுமிக்கொண்டிருந்த சிங்கம் பேச ஆரம்பித்தது.  

"நீ குழந்தை.  உனக்குத் தெரியாது.  ஒரு சிங்கம் சோம்பேறியாக இருப்பது அதன்   தவறல்ல.   பல தடைகளைக் கடந்து ஒரு அரசனாக நடந்து கொள்ளும் நிலைக்குத் தன்னை தகுதி படைத்ததாக ஆக்கிக்கொண்ட எந்த ஒரு  ஜீவனுக்கும் சோம்பேறியாக இருக்க உரிமை உள்ளது.  

பிற பாலூட்டிகளைப்போல் பிறந்தவுடன் தாயை அண்டியே  சிங்கக்குட்டியும் இருக்கிறது.  போதாதற்கு பிறக்கும் பொது குருடு வேறு.  ஒன்றிரண்டு சகோதரர்களுடன் பிறந்திருந்தால் பாலுக்கு போட்டி.  கடுமையான சவானா வெப்பத்தைத்தாங்க வேண்டும். சிறுத்தைகளுக்கும், கழுதைப்புலிகளுக்கும் உணவாகாமல் இருக்க கொடுத்துவைத்திருக்கவேண்டும்.  பல சிங்கக்குட்டிகள் வைரஸ் தாக்குதலுக்குக் கூட இரையாவதுண்டு. பிறக்கும் சிங்கக்குட்டிகளில் இரண்டில் ஒன்றே ஒரு வயதைத் தாண்டும்.  ஐந்தில் நான்கே இரண்டு வயதைத் தாண்டும்.  இதற்குள் பிற கூட்டத்து ஆண் சிங்கங்கள் தாக்கினால் தாயின் பாதுகாப்புகூட கிடைக்காது.  விடலைப் பருவத்தில் பிற ஆண் சிங்கங்களுடன் மோதல்.  இதையெல்லாம் தாண்ட அதிர்ஷ்டம் மட்டும் போதாது.  சக்தி வேண்டும்; சாதுர்யம் வேண்டும்; பிற மிருகங்கள் பயப்பட ஒரு ஆளுமையும் வேண்டும்.  இது எதையும் புரிந்து கொள்ளாமல், ஆண் சிங்கம் சோம்பேறி என்று சொல்வது எப்படி நியாயம்?"

தன் பக்கத்து நியாயத்தை எடுத்துரைத்த திருப்தியில் என்னுள் இருந்த ஆண் சிங்கம் அமைதியானது.

"அப்போ OMRஇல் இருக்கும் TCS, CTS என்று ஏதாவது கம்பெனியில் மேலாளருக்கும் உனக்கும் என்ன வித்தியாசம்?" என்றான் மகன்.  

வேறு ஏதாவது காத்துக்கொள்ளும்படியான metaphor இருந்தால் எனக்கு மின்னஞ்சல் அனுப்பவும்.

No comments: